دكتور
عضو مميز
عدد المساهمات : 199
نقاط : 30486
السٌّمعَة : 0
تاريخ التسجيل : 05/09/2010
 |  موضوع: رباعيات عصام قمر الجديدة الأحد سبتمبر 05, 2010 5:14 am | |
| رباعيات عصام قمر الجديدة أرجو أن تنال الرباعيات إعجابكم كما أرجو
من القارئ أن يحدد أيا منها أعجبته أكثر من غيرها؟
عصام الدين محمد " عصام قمر "
الدنيا فيها حاجات محروم منها الشباب
إغراءات ومتع ياما يسيل ليها اللعاب
بنت زي القمر اتجوزها عجوز خردة
ياخسارة العسل لما يعف عليه الذباب
عجبي !!!
صلي في الشمال قالوا يساري وهنعرف
وصلي في اليمين قالوا يميني متطرف
بس شمال ولا يمين من قدام ولا ورا ؟!
قالوا الورق ورقنا وإحنا بقي نتصرف
عجبي !!!
قالوا البلد حلوة وزينة بس ده سوء إدارة
د شيئ يعرفه الجاهل ومش محتاج شطارة
وطول م كل إدارة فاشلة بتختار اللي بعدها
ييجي علي إيد مين الخير؟! يامليون خسارة
عجبي !!!
قالوا كتيرالسياسة لعبة لكين قذرة
وقالوا زي سياسة العصا والجزرة
بصيت لقيت جوة شغالين بالعصا
وبرة بالجزرة وياعيني ع الحسرة
عجبي !!!
لو واخد حقك ف بلدك برة هيقدروك
عاطل ومسافر هيبيعوا فيك ويشتروك
ويجيبوا الخبير من بلاد برة ويكرموه
وانت يتمثل بيك وف صندوق يبعتوك
عجبي !!!
قالولي شوفها بمراية تانية غير مراية الحبيب
هتبان علي حقيقتها وهتكتشف 100 ألف عيب
ولما وقعت الفاس في الراس وإنكسرت مرايتها
شفت ف حياتي منها اللي يخلي الولدان يشيب
عجبي !!!
لقيتها بترتعش صعب عليا بردها
خدتني الرحمة قلت ف توبي ألفها
ولما حست بالدفا خلاص وبالأمان
لدعتني وأهوجري في دمي سمها
عجبي !!!
طلع الحوت ع البر لقاه مليان حيتان
سحب نفسه رجع وقال د البحر أمان
في البحر هاكل لكن ع البر هتاكل
ولا زي حيتان البني آدمين حيتان
عجبي !!!
من كتر فساد الفضائيات الكل بيعاني
ماهو أوض النوم بقت بلاتوه للأغاني
ونظر الشباب انسحب علي الشاشات
وتبور البنات ومين يتجوز يازماني؟!
عجبي !!!
علي الطريق شاف مصاب قصد الثواب قال أنقذه
نقله بشهامة علي المستشفي لكن الروح فارقته
وعاش المسكين بين سين وجيم ولبس القضية
ولعن اللحظة اللي فكر فيها إنه يراعي إنسانيته
عجبي !!ّ!
الجواز العرفي ف زمانا ده بقي موضة
إضحك ع البت وذل الأهل ماهي فوضة
إتنين تلاتة اربعة بنتسلي ومين يعرف؟!
ولو راحوا عادي مع غيرهم لينا عودة
عجبي !!!ّ
كلام حبيبي ياناس في الحب
أحلي من طعم الكنتلوب
كلمة ف كلمة ياحبيبي الرحمة
قلبي من فرحته هيطب
عجبي !!!
حكمة ربنا في الخلق إننا منعرفش إمتي هنموت
ومن الإيمان بقي إننا نرضي بالقضا ف سكوت
وبين الميلاد والموت منحة إسمها نعمة الحياة
عيشها صح توصل للجنة أو النار لو سبتها تفوت
عجبي !!!
الحياة أيام وسنين عايشينها عايشينها
جنة ربنا عايزينها أكيد وناره خايفينها
وما دام الدنيا فانية سايبينها سايبينها
الآولي نعمل للباقي ونحارب شياطينها
عجبي !!!
إشتري بطيخة ف يوم حر علي ولاده يدخل بيها
لقي جنازة كانت طالعة قصد الثواب مشي فيها
بص واحد حران ع البطيخة وبمكر قال:" كلنا لها"
رد:" محدش واخد منها حاجة" وإيده متبتة عليها
عجبي !!!
كل رئيس أمريكي ييجي أول حاجة يعملها
يجدد عهده لإسرائيل ويعلن إنه مساندها
جمهوري أو ديمقراطي في الهوي سوا
بيطاطوا روسهم لأجل يبوسوا علي إديها
عجبي!!!
طب رحت فين ؟ وقابلت مين؟ شغالاله كما المخبر
إشترتيه.. هو كان عقد جواز ولا عبودية؟ الله أكبر
إختشي.. د هو حتي مبيسألكيش أد إنتي م بتسألي
خلاص وصلنا للزمن اللي فيه عبلة إتحولت عنتر؟!
عجبي !!!
كلنا مشينا في جنازة وإعتبرنا كام ساعة
مش كل واحد أد التاني ف الخشية والطاعة
إلا واحد صاحبنا وإحنا راجعين كان بيغازل
وقت العظة كان عنده يادوب قول ربع ساعة
عجبي !!!
إصحي خي ياعربي وفووق
حـاول ترفـع هامتك فـوق
ياريت تثور لكرامتك مرة
مش كله حاجة تيجي بالذوق
عجبي !!!
قالها : سمعت اليوم في نبأ عاجل
عايزين الست ست والراجل راجل
قالتله : صلي ع اللي هيشفع فيك
علي جثتي لا يمكن يوم راح نتنازل
عجبي !
فتح عنيك حواليك وإلعبها صح الصح
الدنيا لعبة خطيرة عايزة المصحصح
هتغمض عنيك هتتقلب ف لحظة عليك
مينفعش فيها الغلابة وعايزة المفتح
عجبي !!!
قالتله : مالك ياواد غلبان كدة ومستأنس
ومراتك عماله تلعب بيك وعليك بتتمألس
قالها: م الزمان ده بقي زمان الحريم ياامه
قالتله الله يرحم أبوك كان راجل ولا أشرس
عجبي !!!
ياصغير وعايز تكبر وعجلة الزمان تسرعبك
مستعجل ليه ياصغنن ما هو كله من عمرك
وتتمني العمر يجري والساعة تفوت دقيقة
ياخوفي عليك ف يوم تتمني الزمان يرجعبك
عجبي !!!
إتنازلتلها عن سلطتك ودلوقتي قال عايز ترجعها
فيه حاجات لا يمكن ترجعلنا تاني لو يوم نضيعها
ودلوقتي بقت الكوماندة وعلي جواز البنات بتتفق
وإنت دورك بعد الإتفاق تفقع الزغروتة وتسمعها
عجبي !!!
بصيت في المرايا علي نفسي حسيت إنه مش أنا
إلتفت ورايا أدور يمكن يكون حد تاني غيري هنا
جلد مكرمش وشعر أبيض وعيون جفونها متنفخة
كذبت المرايا وأديني بحاول أشتري غيرها من سنة
عجبي !!!
عارفة ليه كرهت ضعفي يوم أصادك؟
وندمت إني متحديتش بقوة شدة عنادك
مكوناش وصلنا للي إحنا فيه وبنقاسيه
خلتيني أتمني من جوايا لو يدوم سكاتك
عجبي !!!
وعدت وقالت ع الحلوة والمرة هنعيش سوا
هنشرب من الحب كاسات والزاد شهد الهوي
بلا فيلا وعربية ورصيد في البنك ولا غيره
ويادوب ست شهور وطلبت الفراق والنوي
عجبي !!!
نروح نتفسح نحس إن الناس كلها بتتفسح ويانا
نزور مريض ف مستشفي نقول كل الناس عيانة
الدنيا بقيت زحام في زحام من كتر الآنام حوالينا
جوع مرض معاناة وبالخلفة الفرحة مش سيعانا
عجبي !!!
فينك يا أستاذ قاسم أمين يامحررالمرأة
تشوف اللي بيحصل في بلدنا من جرأة
مش قادرة ع المنافسة خصصولها مقاعد
تعالي حرر الراجل ولا أقولك مش فارقة
عجبي !!!
ولا تكدب يا إعلام علينا وتقول إننا حلوين
ولا تضلم الدنيا حوالينا وتقول الحالة طين
لو تقول ونقول هيفضل حالنا كدة علطول
ومين يولع شمعة أمل لأجيال بعدنا جايين
عجبي !!!
شعارهم هترفع راسك هتاخد علي أم راسك
مش الحل إنك تنسي وتسكر من خمر كاسك
بلاش كلمة مش أنا اللي هغير الكون لوحدي
خير أرضك مش هيطلع إلا بعد ضربة فاسك
عجبي !!!
قالولها: مين هيغيرك يابلد؟ قالت: اللي من تبعي
ومين اللي من تبعك ؟ قالت:اللي إرتوي من نبعي
أنا أم الدنيا كلها من يومي ولادة ولولادي الريادة
مش هبكي علي اللي راح واقول ياجملي وياسبعي
عجبي !!!
زعل مع الست مراته راح لحماته يشكيلها
زي العادة طلعته غلطان قام ف سره سبلها
أخده حماه علي جنب قال: بص المفيد يابني
تشيل شكوتك جوه قلبك.. زي أنا م شايلها
عجبي !!!
ولقد أعذر من أنذر
مش عليكم بتمنظر
انا بس قلبي عليكم
من البلاء المستنظر
عجبي !!!
لوعاجبك اوي وحابب ان الفواحش شايعة
يبقي اعرف انه اتحجزلك في جهنم ضيعة
أكلها شجر الزقوم يابيه وشربها من الحميم
وعارف فيها مين؟أصحابك الناس الصايعة
عجبي !!!
مش كل بعيد عن العين بعيد عن القلب
ومش كل قريب منك ينفع رفيق للدرب
وياما كتير بنعزهم وإتخلوا ساعة الجد
الحب مش مجرد كلمة د امتحان وصعب
عجبي !!!
موهوم ياللي فاكرسعادتك بإيد غيرك
سعادتك من جواك تملكها إنت بإيدك
لو مستنيها تجيلك هيطولبك الإنتظار
إخلقها إنت بنفسك وإدعي ربنا يزيدك
عجبي !!!
ماشي تقول ياأرض إنهدي ما عليكي أدي
ليه رافع أنفك وشايف نفسك ؟ ياعم هدي
اللي إتكبروا علي ضهرها بلعتهم ف بطنها
آخرةالمتكبر سودة وآخرة المتواضع وردي
عجبي !!!
صحرا وواسعة متجبشي آخرها مد البصر
ملك ربنا واسع ومضيقينها ليه بس يابشر؟
صاحبنا أخده الطموح قال أعمر فيها وأبني
عقدوه إجراءات والذي منه رجع تاني إنقهر
عجبي!!!
ياللي بتسمع كتاب الله وجلدك ما بيقشعرش
د مش كلام بشر يامسكين د كلام رب العرش
بالله إن مكانش كلام العليم الحكيم يهدي قلبك
يبقي إنختم عليه بقفل والفرصة ما بتتكررش
عجبي !!!
ياريت ما رقصت ف فرحها ولا اللي صابها صابها
عجبت صاحب المال والسلطان من حبيبها حرمها
قاومته حط أهلها في السجن وحبيب القلب وياهم
خضعت لما يئست طلع الكل وجوة سجنه حبسها
عجبي !!!
قلتلها: راجعه ليه؟وأي أمل بتتمنيه؟
أملك ولا أملي اللي بغدرك قتلتيه؟!
بقي تقتلي القتيل وتمشي ف جنازته
من الآخر.. قلبي عمرك ما حستيه
عجبي !!!
ياللي نايم ملو الجفون وسبتني أنا سهران
الحب ف عرفك كلام مزوق بأجمل الألوان
حاسس بالندم ع اللحظة اللي فيها حسيتك
غدرك بقي واضح وكل شئ إنكشف وبان
عجبي !!!
يسعدني مرة وأقاسي مرات
ومعيشني سنين في شتات
وكان ايه ذنبي يتعب قلبي
من سوء حظي يطلع بحالات
عجبي !!!
| |
|
